Nýggja Kioskin hjá Astu

Kioskin hjá Astu 2015. Tekning: Palli Gregoriussen

Hvít, reyð og blá. Eins og Merkið. Hon fyllir ikki 100 ár í ár, men hóast tað er hon gomul í garði. Síðan 1935 hevur Kioskin hjá Astu staðið sum ein varði á Vaglinum og heilsað fólki á ferð omaneftir og niðaneftir. Uttan seinastu fýra mánaðirnar, meðan hon hevur verið til høvuðsumvælingar

Kioskin hjá Astu er ein sonn býramynd. Flest allir føroyingar kenna eyðkenda skapið aftur. Navnframi arkitekturin H. C. W. Tórgarð teknaði kioskina í 1931. Tá var hon áttakantað við inngongd.

- Tá ið kioskin var áttakantað, fór mann inn í kioskina at keypa. Hetta hava vit tikið upp aftur. Diskurin inni í kioskini er sniðgivin eins og diskurin í gomlu kioskini, sigur Jóhannes Jensen, stjóri í Gist & Vist, sum keypti kioskina frá Astu.

Nýggja kioskin er meira enn bara høvuðsumvæld, hon er í roynd og veru bygd av nýggjum. Men hon hevur presis somu mát og stødd sum upprunaliga kioskin.

Nýggja kioskin verður heysað upp á pláss

- Stjørnuloftið inni í kioskini er endurnýtt. Hetta er tað einasta, sum varð mett at vera vert at endurnýta. Restin er nýtt. Vindeyguni eru termoisolerað og vit hava installerað vatn og el.

Petur Hans Poulsen og Martin Tórgarð, abbasonur H. C. W. Tórgarð, hava bygt nýggju kioskina. Hon stendur júst sama stað, sum tann gamla, men er snarað 30 stig ímóti tinghúsinum fyri at fáa betri terrassupláss.

- Nú hon er gjørd av nýggjum, er hon gjørd meira opin við meira glasi, enn tað var áður. Og ongar lúkur koma at vera fyri vindeyguni eins og í gomlu kioskini. Hetta er so at siga einasti munur á gomlu kioskini og tí nýggju.

Upprunaliga stóð kioskin á sama stað, sum hon hevur staðið seinastu 35 árini. Eitt skifti stóð kioskin í kommunuskúlagarðinum, men hevur síðani 1984 staðið, har hon stendur nú. Mynd: Havnin -fólk og yrki

Tá ið Gist & Vist keypti kioskina, var tað við tí í huga at varðveita hana og fáa hana aftur til eina virkna kiosk, sum skal selja allar vanligar kioskvørur og bløð.

- Kioskin fer at selja gongumat – m.a. eina spildurnýggj Astuflís (ein serlig tvíflís, red.) – kaffi, sodavatn, øl, vín, bløð og vanligar kioskvørur, sum alt kann njótast á terassuni uttanfyri ella takast við.

Nýggja Kioskin hjá Astu letur upp týsdagin, 21. mai, klokkan 15, tá ið Ólavur Olsen og fleiri fara at spæla horn og veruliga blása lív aftur í Vaglið.

Eirikur Lindenskov og Annika Olsen, borgarstjóri, fara at siga nøkur orð, og so fer Annika eisini at skeinkja 88 ára gomlu Astu fyrsta koppin av kaffi úr kioskini.

- Vit bjóða eisini kaffi og køku til øll, sum koma á gátt, sigur Jóhannes Jensen, stjóri.